ماما هو أنا أجنبى
هذا السؤال فاجأنى به ضياء 6 سنوات بعد عودته من المدرسة وفى عينيه إنكسار لم أعهده فيه وهو
البلطجى جدا
-مين قالك أجنبى
-الأستاذ دخل الفصل وقال مين هنا أجنبى ماحدش رد وبعدين قاللى قوم انت مش انت أجنبى
قلت له لأ انا مصرى قال تعالى انت على جنب. يعنى ايه اجنبى ياماما؟
-اجنبى يعنى مش من نفس البلد دى
-بث انا اتولدت هنا وعايش علطول هنا
-ايوة ياحبيبى بس احنا مصريين لكن كلنا فى الآخر مسلمين
-لما أروح مصر هابقى برضو أجنبى
-لا هتبقى مصرى
-انا عاوز اروح مصر وادخل مدرسة كل اللى فيها مصريين ويكون فيها واحد بس سعودى
-ليه
-عشان اقوله انت أجنبى
ذكرنى هذا بشىء حدث منذ ثلاثون عاما
هيثم 3سنوات ونصف طفل فى حضانة بالشارقة عاد إلى منزله وجدت والدته صرصار جريت وراه
بالشبشب كالعادة صرخ هيثم سيبيه ياماما أحسن يكون مواطن
حكت الام هذه الرواية وهى تضحك وتبكى فى آن واحد لأن إبنها يعانى من تفرقة عنصرية
لأنه مش مواطن عليه أن ياخد على دماغه ويسكت وهو فى هذا السن
إليكم بعض كلمات من أفواه أبناء الغربة من الجيل التانى:
-غدير 27 سنة ولدت وتربت فى الخليج :بالرغم من المستوى المادى والإجتماعى المرتفع
الذى وفرته لى أسرتى إلا أننى أشعر انهم ظلمونى بأن أعيش فى مجتمع أنا فيه درجة
ثانية ولن أكرر خطؤهم هذا عندما أتزوج-شريف 15 سنة:يعنى إيه وطن وطن يعنى أصدقاء ومكان اتربيت فيه وحاجات بتحبها كل ده
انا أجده هنا فى الغربة بأحس بالغربة فى مصر حتى بيضحكو على طريقة كلامى (لهجته
لاتكاد تجعلك تميز أنه مصرى)-شيماء 17 سنة:باحب مصر طبعا بس مصر بالنسبة ليا إجازة فسح وبحر وساحل شمالى
وعزومات عند عماتى وخلانى وجدو وتيتة مش عارفة لما أدخل الجامعة هأتأقلم إزاى لكن
برضو باحب مصر-أفنان 17 سنة :بحب مصر آه لكن هنا كل ذكرياتى هم 4 سنوات اخلص الجامعة وأرجع اعيش
هنا-ابراهيم 19 سنة (يدرس بمصر منذ سنتين) بأحس بالغربة فى مصر جدا بابا وماما
بيكلمونى كل اسبوع مرة بافتقد جو الأسرة انا حاسس انهم أنانيين كان مفروض ينزلو
معايا-شادى 7 سنوات انا باتكلم زى المواطنين وبالبس زيهم بس مش عارف هم ليه مش بيصاحبونى
وبينادولى يامصرى كانها شتيمة هى مصرى دى شتيمة-محمد 11 سنة :ولد بيقوللى انت جدك فرعون قلت له وانت جدك أبو جهل الأستاذ ضربنى
أنا بس إشمعنى-تسنيم 8 سنوات:ينفع تعملولنا هنا مدرسة كل اللى فيها مصريين؟
-أحمد 20 سنة والده يعمل بالخارج من 17 سنة:بأحس ان بابا انسان غريب عنى وانا صغير
كان بيوحشنى لكن دلوقتى باستحمل إجازته بالعافية هو بالنسبة ليا مصدر للفلوس وبس.كلام كتير جدا يشيب ويخللى الواحد يقف مع نفسه 100 مرة عشان يراجع حساباته ويشوف هو
بيعمل ايه ومتغرب ليه وايه الإيجابيات والسلبيات الجزء ده خاص بالأبناء بس فيه جزء
تانى خاص بينا إحنا وتأثير الغربة علينا وجزء تالت خاص بأرحامنا وأقاربنا اللى
بنتغرب بعيد عنهم وتأثير ده عليهم وعلى علاقتنا بيهم
الخلاصة بالنسبة للأبناء بيحصل لهم ده:
• فقدان الشعور بالوطن وبالتالى فقدان الإنتماء
• الشعور بالدونية والمعاناة من التفرقة العنصرية
• التعود على المستوى المادى المرتفع والرفاهية مما يفقده القدرة على التأقلم مع
متطلبات الحياة فى وطنه
• فقدان الترابط الأسرى مع أقارب الدرجة الثانية مثل الأعمام والخلان يصبح الطفل
بعد والده مالهوش كبير
• فى بعض الدول لا يكون المستوى الدراسى يعمل العقل بنفس مستوى المناهج بمصر بحيث
ان الطفل يعانى عند إكمال الدراسة بوطنه
• الحياة المنغلقة التى تفرضها علينا الغربة تفقد الطفل جزء كبير من شخصيته
المتواصلة مع المجتمع وحينما يضطر للإحتكاك المباشر تشوف العجب
ده اللى توصلت له من خلال البحث فى هذا الموضوع ياريت نفتح باب النقاش فيه ونجد
حلول لكل نقطة ونخرج بتوصيات تساعدنا على إجتياز هذه المصاعب
يونيو 15th, 2006 at 3:08 am
الموضوع رائع جداً يا ماما … أجمل حاجه فيه إنه بيخلى كل اللى فى نفسه حاجه من الغربه يطلعها … حاولت أرد فى الموضوع فى القهوه بس للأسف ملقيتش كلام أقوله … انا الحمد لله عمرى ما اتغربت ( غير غربه داخليه 4 ايام فى المدينة الجامعيه و 3 فى البيت !!!
) بس كنت متابع ومستمتع جداً … شكراً 
يونيو 19th, 2006 at 10:39 am
مرحبا بك ياشادو
ربنا ما يحكم عليك بالغربة أبدا
ماما
يوليو 23rd, 2006 at 3:54 pm
السلام عليكم.. أنا اتولدت واتربيت في إحدى دول الخليج، وعندما جئت لمصر للدراسة في الكلية وجدت صعوبة في فهم الجو والبنات في البداية، كان عندي إحساس إن البنات بيتكلموا بسرعة وبيضحكوا على حاجات هايفة ! بنت واحدة بس اللي حسيت ان ممكن نتفاهم بس مش لدرجة الصداقة وكانت مولودة ومتربية برا برضه !!! يمكن عشان كده فهمنا بعض..
بالنسبة للمستوى الدراسي لقيت كل الطلبة زي بعض تقريبا، يعني مستواي في نفس مستوى الطلبة اللي درسوا طول حياتهم في مصر…
ما حسيتش بفرق في دي…..المشكلة بس في التأقلم مع النّاس هنا..لأن هناك بيبقى فعلا الجو منغلق ، كل واحد في بيته ، وقت الخروج بنخرج بالعربية مع بابا ونرجع تاني البيت، زيارات غير عائلية بسيطة ..
مفيش جو الانفتاح والحريّة زي هنا….
بس برضه مصر حلوة…