مامتكم دوت كوم

خناقة العيد الكبير
-شحيبرررررر-

نعم-

انت عارف النهاردة كام هجرى-

النهاردة 26 هجرى كويس انك فكرتينى-

الحمد لله انك افتكرت-

طبعا ودى حاجة تتنسى ايام عشر ذى الحجة دى كلها بركة-

عشر ذى الحجة ؟-

ايوة ياشحبورة ايه رايك نصوم التسع ايام كلهم ونخللى العيال يصومو معانا-

وماله نصوم وايه كمان-

ونقوم الليل — ممكن العيال يصلو ان شاء الله ركعتين قبل الفجر عشان يتعودو-

-جميل مش ناسى حاجة مهمة?

-لا طبعا الذكر والدعاء والصدقة ياااااه كأن رمضان رجع تانى

-الللهم طولك ياروح مش ناسى حاجة

-اكيد قصدك يوم عرفة ده يوم ما يتنسيش فضى نفسك اليوم ده تماما ونعيشه كده كأننا على جبل عرفات ياسلام ياشحبورة انتى زوجة صالحة بصحيح

-شحيبررررررر

-نعم

-بعد يوم عرفة فيه ايه

-فيه صلاة العيد طبعا

-والناس بعد الصلاة بتعمل ايه

-آه قصدك الاضحية؟

-ايوة عليك نور خروف العيد شايفاك يعنى مطنش السنة دى الناس اشترت ورابطين الخروف قدام بيوتهم وانت ولا على بالك

0آه والله ياحبيبتى كان نفسى بس انتى عارفة العين بصيرة والايد قصيرة والدتى لما دخلت العناية المركزة دفعت كل اللى معايا للمستشفى والدنيا غليت والتزاماتنا كترت هاجيب منين انا عارف ان ثواب الاضحية كبير بس لا يكلف الله نفسا الا وسعها

-شحيبر ربنا ما يقطعلك عادة ياخويا الخروف ده حاجة مهمة جدا لا يمكن يمر العيد من غير ما ندبح

-مش مسألة عادة يا شحبورة هى عبادة وفضلها كبير

-لا بالنسبة لى عادة ماقدرش اقطعها ولا اسنحمل كلام الناس ولا نظرتهم ليا وانا كنت يد عليا وابقى يد سفلى

-ايه اللى بتقوليه ده عليا ايه وسفلى ايه انتى كده ضيعتى ثوابك عن اللى فات كله المرات اللى دبحنا فيها كان نيتك الدبح للناس واللا لله

-لله طبعا بس برضو نظرة الناس

-ما تكمليش بوظتى نيتك ياشحبورة ربنا عالم ان نيتى لو معايا ادبح ربنا يكتبلى الثواب

-اخويا هيدبح يوم الوقفة هآخد العيال أفرحهم عنده

-يدبح الوقفة ليه؟

-كده انضف بدل الزوطة يوم العيد

-كده تبقى صدقة مش اضحية

-باقولك ايه الناس كلها بتعمل كده هتغير الكون

-مش عارف ياشحبورة انهى كون اللى عايز يتغير انتى كون لوحدك

-خلاص قفل على الكلام ده بدال ما نتخانق

ذهب شحيبر لعمله وعاد ليجد خروفا مربوطا فى باب العمارة استقبله البواب متهللا

- ربنا ما يقطعلك عادة يابيه ماتنساش نصيبنا اشوفلك جزار تتفق معاه من دلوقتى؟ هتدبح الوقفة واللا العيد؟

-ازبهل شحيبر مستغربا هو الخروف ده بتاعنا؟

-ايوة يابيه المودام جابته الصبح ووصتنى عليه

-شحبووووووووورة

-نعم

-ايه موضوع الخروف ده

-ده خروف ايجار عشان امنع كلام الناس وافرح العيال — عندك حل تانى

-ودبحه برضو ايجار واللا هنعمل دبح فبركة

-لا كمان كام يوم هارحعه واقول انه صحته ما جاتش على الربط وانى وديته البلد وهندبح هناك واللحمة اللى تجيلى اوزع منها وأمرى لله عاجبك كده

-كل ده عشان الناس وكلام الناس ياريتك بتجتهدى كده لربنا اللى خلق الناس
حسبى الله ونعم الوكيل