مامتكم دوت كوم

كل عام وأنتم جميعا بألف خير أهل علينا رمضان بنفحاته وبركاته وفى قلب كل منا عهد (لإن أشهدنى الله رمضانا جديدا ليرين الله ما أفعل) فهل سنصدق ما عاهدنا الله عليه هاهو ربنا قد أمد فى عمرنا ومنحنا فرصة جديدة لتكون لنا صفحة جديدة فماذا سنكتب فيها اللهم لك الحمد أن بلغتنا رمضان ولك الحمد أن هديتنا لفضل رمضان اللهم أتم نعمتك وفضلك علينا وارزقنا فيه حسن عبادتك آمين ماما

إبليس بك فى إجازة

بعد رحلة ميسرة جدا بفضل الله لمطار برج العرب الدولى وصلت مامتكم الى الاراضى السكندرية حيث قد تكون تلك الرحلة الأخيرة بعد قرار بالاستقرار فى إسكندرية المرية أم التراب الزعفرانى مطار برج العرب الدولى شقتين فتحوهم على بعض وقالو ده مطار ولكن المعاملة ممتازة جدا ماعدا الكهربا اللى كل شوية تقطع ويتوقف السير اللى عليه الشنط ولكن بفضل الله تعود الكهرباء مرة اخرى المفروض يكلمو صاحب المطار يركب لهم مولد كهربا

من اللحظة الأولى تبدأ المشاوير الحكومية بعضها فى الإسكندرية والبعض الآخر يستوجب المشوَرة للقاهرة
السجل المدنى: وما أدراكم ما السجل المدنى تذهب إليه فى الصباح البااااااااااااااااااكر لتجد الطوابير وكأنهم قد باتو على بابه
فى الداخل إنشرح صدرى كل الموظفات محجبات قلت لنفسى لو أن حكومة إسلامية فرضت على الناس الحجاب لهاجو وماجو ولكن الناس قد إرتضوه لأنفسهم هكذا يجب أن يكون الإصلاح من تحت لفوق وليس من فوق لتحت
إضطرنى الأمر للبقاء بالداخل قليلا العباءات والخمار ياسلاااااااام ناس ملتزمة بصحيح
الأستاذة محاسن بتفطر طبيعى مافيش مشكلة لازم تفطر يدخل زميل: -ياصباح الفول والطعمية -ترن ضحكة حيانى لا تتناسب ابدا مع الخمار -انت هتبصلى فى اللقمة ياراجل طب والنعمة ده أول سندوتش -مش قولتى بتعملى ريجيم -إسكوت قطع الريجيم وسنينه -(يدخلان فى حوار عن الآثار الجانبية للرجيم حوار للكبار فقط) أنا-يامدام الملف
-آه إنتى لسة هنا هأقوم اشوفهولك -وسع ياراجل خلينى أعدى -مش موسع عدى -باقولك وسع أنا متوضية ترد أخرى مختمرة كانت جالسة تقرأ فى المصحف -إنتى عاداه راجل زى باقى الرجالة عدى ده زى أختك (ضحكة أخرى مجاجلة) ويمر الموقف بعد أن سمعت ماشنف آذانى ولا أستطيع أن احكيه لكم أنهيت معاملتى وأنا فى قمة الإزبهلال من التناقضات وال………….عجائب

نميمة على الطراز الإسلامى فى النادى الحمد لله الرواد قليلون إخترت طاولة قريبة من سيدتين فى منتصف العمر بيديهما مصاحف بيسمعو لبعض قرآن ماشاء الله كان من النادر أن أجد محجبة واحدة فى النادى وكنت عجبة أثناء التسميع جاء طفل إحداهما يبكى -مامى الولد اللى هناك حدف عليا رمل -فين الولد ده فين مامته يشير الى سيدة جالسة بعيدا ذهبت الأم وحلت المشكلة بيسر وعادت -إنتى عارفة مين دى اللى معاه؟ -مامته -هو قالك انها مامته -لا قال معايا هونى -دى جدته -ياشيخة حرام عليكى جدته ايه -انتى برضو ماعرفتيهاش دى نرمين محمود -نرمين محمود مين بتاعت مجلس الادارة دى تيجى فوق الستين -آه ماهى فعلا كده بس عملت عملية شد لرابع مرة خدى بالك كده من ايديها -آه صحيح ياخبر ابيض أهى دى بقى العجوز المتصابية -لا وايه متجوزة ولد قد ولادها -حفيدها ده من جوزها الاولانى اتجوزت بعده 6 مرات -باقولك ايه دع الخلق للخالق كملى تسميع -انتى بتحفظى مع مين -مع هدى -انا قلت كده برضو تجويدك مش قد كده هدى دى مش متمكنة خالص -لا دى لذيذة والله وبنت حلال -ايوة لكن تجويدها مش حلو اصل اليومين دول بقت استرزاق كل اللى مالوش شغلة يشتغل محفظ يكملو تسميع تدخل سيدة فى الخمسينات وتلقى عليهما التحية وتجلس بعيدا بعد قليل جاء فتى رياضى جدا فى العشرينات وجلس معها -ماشاء الله ابنها يشرح -ميمى -آه اسمه محمد باين -انتى ماتعرفيش؟ -ماعرفش إيه تهمس فى اذنها بكلمات يحمر لها وجهها -ياشيخة إزاى -الدنيا كلها عارفة دى كانت فضيحة إنتى كنتى مسافرة ايامها مسكوه فى المدرسة مع ولد تانى وكانت فضايح وبعدين مامته خدته لدكتور نفسانى عشان يتعالج وكان مرتاح جدا معاه وبعد سنتين اكتشفت ان الدكتور هو كمان مش طبيعى وزود الحالة عنده والولد بقى مقتنع ان هو اللى طبيعى والناس كلها غلط وبقى علنى كده يتكلم فى الحاجات دى وكان عاوز يعمل كمان جروب للى زيه -أعوذ بالله -آه زى مابقوللك كده وسافر أمريكا اتنيل أكتر -والله ولا باين عليه -انتى بس اللى على نياتك كملى تسميع هم يكملو تسميع وأنا أكمل سماع للنميمة على الطريقة الإسلامية فى بلاد ال………..عجائب

عند الخياطة فتاة محجبة ووالدتها جالسات للبحث فى مجلات الأزياء عن موديل فستان زفاف لمحجبة إختارت فستان عريان جدا الخياطة قالت مافيش مشكلة اختارى الموديل اللى يعجبك وكل حاجة لها تصريفة وكانت التصريفة كالتالى بودى لون اللحم تلبسه المحجبة وفوقه الفستان العريان يبدو للناظر إليها أن لحمها كله بره بينما هى مستوووووووورة بالبودى اللى لون اللحم بنضحك على مين وليه ؟مازلت مزبهلة فى بلاد العجائب مامتكم

فى بقعة ما من هذه الأرض الكروية وفى بقعة نائية جدا من هذه البقعة الاولى وفى فترة من الزمن تتقلص فيها الحياة إلى كرة وصحن لاقط (دش) وفى ساعة حاسمة من الزمن تتوقف عنده عقارب الساعة وتتوقف الأنفاس كانت قصتنا مريضة بائسة شاء الله ان تكون فى حالة حرجة جدا تشارف على الموت حملت للمستشفى النائية فى البقعة النائية أجرى لها كل ما يمكن من إسعافات الساعة الآن السادسة مساء الجراح فى غرفة العمليات وجميع الفرق المساندة فى حالة استنفار قصوى لإنقاذ حياة المريضة كلما إقتربت عقارب الساعة من اللحظة الحاسمة دق قلب الجميع وقبل اللحظة الحاسمة بقليل إختفى الجميع صرخ الجراح اين دكتور التخدير؟؟؟؟؟؟؟ موزود سير (موجود سيادتك) إختفى الطبيب العربى وحل محله آخر أقل ما يقال عنه انه هندى عاوزين دم بنك الدم بسرعة موظف بنك الدم اختفى وترك المكان لممرضة بديلة ما تعرفش حاجة مختبررررررررر ياناس لموافقة عينات الدم موظف المختبر اختفى وهناك ممرضة بديلة ستقوم بالعمل ولكن لاتعتمد على النتيجة قررنا تحويل الحالة لمستشفى مركزى لضعف الإمكانيات هنا سيارة الإسعاف مااااااااااااااااااافى إختفى السائقين والسيارات إضطر الجراح لإستكمال العمل تحت شعار (الشاطرة تغزل برجل حمار) اين زوج المريضة ليوقع على إقرار بالموافقة على العملية زوج المريضة ماااااااااااااافى إختفى أجريت الجراحة وبدعاء الوالدين أنقذت حياة المريضة بعد 6 ساعات من العمل المتواصل بغرفة العمليات خرج الجراح وهو ينتوى إغتيال الجميع الساعة العاشرة مساء كل فى مكانه والعمل على أتم وجه أين كنتم ياااااااااااااااااا ————————- كلمات كالقذائف لابد منها همست ممرضة للدكتور اليوم مرفوع عنا القلم ترى الأخضر يلعب أخضر أخضر ميييييييييييييين ياااااااااااااااااا —————-(الجراح يكره كرة القدم ويعتبرها أفيون الشعوب) نظر إيه الجميع نظرة إتهام بالخيانة العظمى كيف يادكتور إنت ماتشجع الأخضر؟؟؟؟؟؟؟؟؟؟؟؟؟ ونظرا لأن الأرض كروية والمريضة والتى أفاقت لتسأل ماذا فعل الأخضر وزوجها الذى تركها بين الحياة والموت ليشجع الأخضر فقد انتهى الموضوع تماما وانحصر الإتهام فى من إحتكر إذاعة المونديال وحرم الناس من تشجيع الأخضر فى أثناء ساعات العمل الرسمية وتوتة توتة خلصت الحدوتة