مامتكم دوت كوم

طوابير الجوازات ربنا مايحكم على حد الاقى طابور فاضى حبتين اقف فيه والعيال على اكتافى
-ياحاجة مصرية؟
-ايوة الحمد لله
-طيب روحى الطابور اللى هناك هنا لغير المصريين
انظر للطابور المشار اليه وايأس
ابحث عن كرسى مفيش صعبت على واحدة طيبة اجلستنى ماحدش يتصور الحر فى عز أغسطس والتكدس على طابورين فقط -شاب يمر مناديا الاستاذ مجدى محروس المصرى
مجدى محروس المصرى يقترب منه قادم زهق من الطابور
-الاقى عندك اسم مجدى محروس الحلوانى يقولها ويعطيه جواز سفره وقد ظهرت منه ورقة بعشرين جنيه ينظر فى الجواز
-لا ياباشا مجدى محروس المصرى يعيد الكرة وقد استبدل الورقة باخرى بخمسين جنيه -ايوة لقيت الاسم اهوه تعالى معايا
الحر قاااااااااتل والعيال هتفطس انتهى طابور الغير مصريين ظننت انهم سيوزعوننا عليه اذا بالضابطين يغادران ويبقى طابور المصريين يسد عين الشمس
يضيق صدر احد المسافرين يصرخ محتجا
-هو الذل مكتوب علينا جوه وبرة فيه ايه حرام عليكم يتوقف الجميع عن العمل ويخرج رتبة كبيرة يزعق - مين اللى بيزعق هنا
يحاول الجميع اسكات الرجل عاوزين نخلص -ياباشا انا ماكانش قصدى بس يعنى -بس ايه -مافيش ياباشا حقك عليا
-اطلع بقى من الطابور هتكون اخر واحد يخلص تهمس لى السيدة بجوارى -انا عندى القلب والسكر ماتيجى نجرب حكاية الحلوانى دى
-تنادى على الشاب الاقى عندك اسم مديحة عبد العال الحلوانى -وتناوله الجواز وبه المعلوم -انت مديحة مانا عمال انادى عليكى من الصبح
تشد الجواز من يدى -هاتى جوازك معايا حرام عليكى العيال هتفطس منك -ماهو أصل بلاش أنا -يالهوى على البخل والله لادفعهملك أنا هاتى بس :أخخخ: -مش بخل بس أصل خدت الجواز ولحقت به -ينوبك ثواب فى الحاجة دى -هاتى ياست —أضع المعلوم بعد عدة دقائق إختفت مرافقتى وعاد الشاب وهو يتلفت ووجهه أصفرررررر -خدى جوازك ياحاجة وفلوسك اهى حرام عليكى عندى عيال عاوز اربيهم
-ما انا قلت من الأول بلاش
استسلمت حتى انتهى طابور العذاب وجاء دورى يافرج الله صحيت توتة- إنزلى بقى جنبى ياتوتة
-وثلنا المصر ؟ -ايوة وصلنا المصر -هى دى -ايوة هى دى -ليه زحمة وحر كدة مافيش عندهم تكييف -لا إزاى فيه طبعا بس نخلص تعالى معايا -الحمد لله على السلامة ياحاجة ممكن بس تكشفى وجهك -آه طبعا حاضر أكشف وجهى -يختم الجواز بدون ان ينظر اليه
-خلاص ياحاجة استلميه من الشباك -انت ما اتأكدتش من شخصيتى -أستغفر الله ياحاجة إحنا برضو مسلمين ده أنا أختى والله منقبة زيك كدة -يعنىتخلينى اكشف وشى قدام الناس دى كلها وأمة لا إله إلا الله تتفرج عليا وانت ماتتأكدش من شخصيتى -والله ماهو بخطرى يادكتورة دى حاجة حلوانى كده عشان ماحدش ياخدنى مخالفة يقول هذه الكلمات وهو يقلب فى الجواز الذى عاد إليه مشفوعا بكلمتين

مطلوب فورا -معلش بقى يادكتورة لازم اتأكد مرة تانية من شخصيتك فيه حاجة غلط يتأكد
-اتفضلى فى الغرفة المقابلة أجلس على كراسى امام الغرفة حولى مجموعة من الملتحين اقول لنفسى هما السؤالين إياهم بابا فين بابا الله يرحمه مات من 12 سنة ومانزلش مصر ليه قلنا مات واندفن برة شكرا مع السلامة

والدى كان من الإخوان المسلمين الذين غضبت عليهم السلطة وطلب للتحفظ عليه فى عام 1981 ولكنه خرج برة مصر وتوفى بالخارج ولم يغلق ملفه للآن هأحكيلكم حكايته بعدين

لكن كل مرة (مطلوب بس) ايه اللى خلاها(مطلوب فورا) يكون معلومات الداخلية ان الحاج صحى تانى والله انا بدأت يراودنى الأمل فى صحيانه

إيه حكاية مطلوب فورا وليه مطلوب فورا ومين اللى مطلوب بالظبط إظبطو زوايا وعجل عشان هتفطسو من الضحك وهتشوفو صورة المشبوهة رقم واحد واللى هتعرض لمدة 24 ساعة فقط عشان الحسد

إستقريت على مقعدى فى الطائرة المغادرة إلى القاهرة طفل على رجلى وطفلة بالمقعد بجوارى وبناء على قوانين الغيرة الطفولية إستقر الإثنين على حجرى واستسلما للنوم طاقم الطائرة يرحب بنا –دعاء السفر يااااااااااااه يامصر بحب كل شبر فيكى مهما كان
بس السفر فيه فراق سواء وانت رايح واللا وانت جاى
ياترى مين هيقابلنى فى المطار استعرض كل معارفى طبعا مش ممكن ماحدش فاضى هييييييييه يابنت عليكى بالسوبر جيت وتوصلى اسكندرية تلاقى زفة كبيرة ولا يهمك
وصلنا مطار القاهرة فكو الأحزمة مع السلامة أنا آخر من ينزل من الطائرة ليه؟ الطفلين نامو وعلى حملهم نائمين كل واحد فى ايديه ما يكفيه
الشنطة على كتفى والاطفال كل على كتف والباسبور ممسوك بطريقة بهلوانية اسير فى الممر الطويل ياسلام مصر حبيبتى يامصر
فجأة اصطدم بطابور
معقول هى الجوازات جابوها قريب هنا حاجة جميلة خالص
أتسائل فيه ايه -بتوع الصحة -وماله زمايلنا وحبايبنا -اصطدم بجسم مستدير غير متضح المعالم ارفع عيناى إذا بممرضة مصرية فاميلى سايز تمسك مقياس حرارة من الأذن
- طلعيلى ودانك برة الطرحة ياحاجة
- اطلعها ازاى وانا شايلة العيال -مش شغلى ياللا مش فاضيين -احدي المسافرات تحمل طفل عنى وبحركة بهلوانية احاول اخراج اذنى وانا اتسائل -فيه ايه
-ده عشان السارس بعيد عنك -برزت اذنى إذا بالممرضة تطرقع بالترمومتر فى الهواء ياللا ياحاجة حمد الله عالسلامة
-الله كان لازمته ايه الغلب ده لما هتطرقعى فالهواء
- تزووووووم ده عشان مصلحتك ياحاجة حاجة حلوانى كده لزوم السياحة حاجة حلوانى كدة - حلوانىىىىىى؟؟؟؟؟؟؟؟
-ماهو لو قست حرارتك وطلعت عالية شوفى بقى اللى هيجرالك
هيه تحبى اقيسها هاتى اما اقيس للعيال تتوعدنى بمقياس الحرارة بيدها - لا ابوس ايدك بلاش العيال دول مابيبطلوش سخونية
-طب ياللا روحى على الجوازات وبلاش كتر كلام ياسلام يامصر كنت مشتاقة لحد يستقبلنى بالمطار فيه إستقبال أحلى من كده حاجة حلوانىىى خالص يتبع..