مامتكم دوت كوم

اسرار الصفقة السرية للإخوان المسلمين

ماما — Sun, 20 Apr 2008 10:43:05 +0000

أسرار صفقة الإخوان مع………

تحدث الكثيرون عن صفقة الإخوان مع الحكومة وادعى البعض ان الاخوان يغازلون النظام ويهادنونه وبين منكر ومعترف تظهر صفقة اخرى بين الاخوان وامريكا لاسقاط النظام المصرى كل هذه التكهنات لا تجد لها دليل اثبات او دليل نفى . ولكن المتابع لتاريخ الاخوان منذ انشاء هذه الجماعة يجد ان هناك صفقة مستمرة بين الإخوان وبين القوة العظمى المهيمنة على العالم وهذا ان دل على شىء فإنما يدل على ذكاء الجماعة وبعد نظر قياداتها لان التحالف مع الانظمة انما يخضع لعوامل محلية خاضعة للتغيير انما التحالف مع القوة العظمى التى تتحكم فى هذه الأنظمة انما هو يضمن للجماعة استمرارية اكبر .

والآن هيا بنا نلقى نظرة على تاريخ الإخوان منذ نشأتهم لنتفهم هذه الصفقة: • الاخوان قدمو شهداءهم فى حرب 48 وأبلوا بلاء حسنا حتى بدا لعدوهم انهم اكثر القوى خطرا عليه وكانت النتيجة اعتقالهم جميعا ثم اغتيال مرشد ومؤسس الجماعة. • اختلف الاخوان مع ثورة يوليو حول عودة النظام النيابى فى مصر وتطبيق الشريعة وكان لهم تأثير عالى على القوى الشعبية مما نتج عنه مسرحية محاولة اغتيال عبد الناصر واعتقالهم جميعا 1954 • مذبحة الاخوان عام 1965 والتى اعدم فيها ستة من قيادات الاخوان بتهمة التخطيط لقلب نظام الحكم وقضى البعض مابين 15 الى 10 اعوام • عام 1981 اعتقال قيادات وشباب الاخوان ضمن المعارضين لسياسات الرئيس الرحل السادات ثم اكتملت الصورة باعتقال الالاف منهم بعد اغتياله • وتستمر الجماعة المسماة بالمحظورة فى عهد الرئيس مبارك تتلقى الاعتقالات المتتالية بحيث لا يكاد يخلو يوم من عدد من اعضائها فى المعتقلات المصرية قل العدد او كثر • 1995 تعرضت جماعة الإخوان المسلمين سنة 1995 إلى أول ثلاث محاكمات عسكرية في عهد الرئيس حسني مبارك.

أول يناير/كانون الثاني: اعتقل 49 عضوا من الجماعة بتهمة محاولة إحياء جماعة محظورة، وحكم بالسجن على 34 من المحالين بمدد تتراوح بين 3 و5 سنوات بينهم القيادي بالجماعة عصام العريان، وبرئ 15 عضوا في الجماعة.

نوفمبر/ تشرين الثاني: حكم على 3 من الجماعة في القضية الثالثة، وحصل اثنان منهم على أحكام بالسجن من 3 إلى خمس سنوات، وبرئ الثالث.

• ديسمبر/ كانون الأول: اعتقل 33 من أعضاء وقيادات الجماعة، وحكم على 20 منهم بالسجن من 3 إلى 5 سنوات، و برئ 13 منهم.

1996 اعتقلت الحكومة المصرية 13 عضوا بالجماعة في رابع قضية، كان ضمنهم المرشد الحالي محمد مهدي عاكف والمهندس أبو العلا ماضي. وأحيلوا إلى المحاكمة العسكرية فيما عرف بقضية “حزب الوسط”، وصدرت فيها أحكام بحق 8 ممن أحيلوا، وتراوحت المدة بين 3 و5 سنوات، وأطلق الخمسة الباقون.

1999 شهدت تلك السنة المحاكمة الخامسة وشملت الاعتقالات 20 من الناشطين النقابيين من الجماعة، وحكم على 15 منهم في نوفمبر/ تشرين الثاني 2000، لفترات تتراوح بين 3 و5 سنوات، وأفرج عن الباقين.

2001 اعتقل 22 من الأساتذة الجامعيين من الإخوان في سادس قضية تخص الجماعة في عهد الرئيس مبارك، وصدر الحكم فيها سنة 2002 بسجن 15، وبرئ السبعة الباقون.

2008 اعتقلت الحكومة 40 من أعضاء الجماعة للمرة السابعة، بينهم النائب الثاني لمرشد الإخوان خيرت الشاطر، وذلك على خلفية استعراض رياضي نظمه مجموعة من طلبة جامعة الأزهر من أبناء التنظيم بالملابس العسكرية.

واستمرت المحاكمة 73 جلسة انتهت بأحكام تراوحت بين 3 و10 سنوات على 25 من المحالين بينهم الشاطر وتم تبرئة 15.

• مصادرة أموال منسوبى الجماعة ونهب بيوتهم وأغلاق شركاتهم عالميا ومحليا بدون وجه حق.

• هذا غير الاعتقالات الدورية قبيل الانتخابات المحلية او التشريعية وقبيل صلوات الاعياد واحيانا بدون مناسبة تماما لمجرد تذكير الجماعة بأنها محظورة.

كل هذا كان نصيب الجماعة من هذه الصفقة فماذا إذن جنت الجماعة من هذه الصفقة وما هو مدى استفادتها منها وماهى الصفقة اصلا ؟؟؟؟؟؟؟؟؟ كل هذه اسئلة تحير المراقب والمتابع لهذه الاحداث

واليكم بنود الصفقة كما وردت فى الوثيقة الموحدة التى وجدت فى حوزة الإخوان ولا يكاد يخلو منها بيت من بيوتهم :

(إِنَّ اللّهَ اشْتَرَى مِنَ الْمُؤْمِنِينَ أَنفُسَهُمْ وَأَمْوَالَهُم بِأَنَّ لَهُمُ الجَنَّةَ يُقَاتِلُونَ فِي سَبِيلِ اللّهِ فَيَقْتُلُونَ وَيُقْتَلُونَ وَعْدًا عَلَيْهِ حَقًّا فِي التَّوْرَاةِ وَالإِنجِيلِ وَالْقُرْآنِ وَمَنْ أَوْفَى بِعَهْدِهِ مِنَ اللّهِ فَاسْتَبْشِرُواْ بِبَيْعِكُمُ الَّذِي بَايَعْتُم بِهِ وَذَلِكَ هُوَ الْفَوْزُ الْعَظِيمُ (111)التوبة) هذا هو نص الصفقة التى عقدتها الجماعة منذ بدايتها مع رب العالمين المهيمن على هذا الكون والقوى فوق قوى الانظمة البائدة الفانية مصرف الامور ومقلب القلوب .

وأتساءل مع المتساءلين هل هناك جماعة او حزب او اتجاه قدم ما قدمه الاخوان وعانى ما عاناه الاخوان واى جماعة او تنظيم كان سيصمد هذا الصمود ويستمر هذه الاستمرارية مهما كانت صفقاته وبنوده السرية واى صفقة تلك التى تسلب المرء حريته وماله وروحه واى مقابل يقبل به عاقل الا ذلك المقابل الذى ارتضاه الاخوان. ولا ينطبق على حالهم الا ان اقول

قدمو الارواح قربانا على مذبح الحرية وما ابتغو بذلك الا رضا رب البرية

الخيبة الكبيرة

ماما — Mon, 14 Apr 2008 19:00:12 +0000

الخيبة الكبيرة .. اوبريت من انتاج الاخوان المسلمين يهاجم الحزب الوطني

للتحميل بصيغة rm هنا

تقول كلمات الأغنية: قايمة حزب الفساد وضبوها.. واتخانقوا كتير قوي لما اختاروها.. قايمة حزب الوالي بالظلم جايه.. محلي القوايم لما زوروها.. ادفع ادفع.. دا اللي ما يدفع.. عندنا يرجع.. يرجع يرجع ويقول.. اللي يقول الحزب اختارني.. خش واتقرطس ولا شارني.. يسترك هات حزب بقرش.. حزب مالوش شعبية.. حزب لا ليك ولا ليا.. الحق اسرق وزور اسعي.. ده الصندوق أبو ذمة واسعة .. الله الله الله.

وتنتقل الأغنية إلي المقطع الثاني الذي يقول: الخيبة الكبيرة يا عمي.. والعسكر كتيرة.. ماليين الشوارع يابا بالشوم والبنادق.. دول مخبرين ودول أمن دولة.. دول بلطجية جاين مقاولة.. يا حضرة الأراجوز قوللي.. نعم عاوز إيه.. الخير حقيقي هيوصلي.. امدح نبينا وصلي عليه..

هيخدعوك علطول علطول لحد ما تدي صوتك.. تسأل عليه تلاقيه مشغول لحد ما يطلع روحك.. وتجوع مراتك وعيالك.. مافيش لا زيت بقي ولا سكر.. وهو عايش وبمالك.. بيمشي علطول يتمختر.. يفضل كده يسرق ويغش لحد الخازنة ما هاتنش.. ولما تلقي الحزب فشنك.. اعرف إنك تهت وضعت.. ياه دي الدنيا ضلمة والتوهة جاية.. مع السلامة.. مع السلامة.. مع السلامة في الجولة الجاية..

فتح عينيك إياك تهرب.. صوتك صوتك اللي هيكسب.. الليلة الحزب دا عامل لجنة تساوي جنيه قولوا هيه.. وقالوا لنا تشاركوا بصوتكوا تعالوا تشوفوا هيحصل إيه قولوا هيه.. هيه هيه هيه.. اللجنة شاويش يهجم علي الناخب يقبض الضهر عليه.. نسوان شكل الحناطير طايحين وأنا عارف ليه.. وكمان واد مرشد قاعد يرصد كل اللي يمر عليه..

وتصل الأغنية إلي المقطع الخاص بالطهور في الأوبريت والذي حاكته بقولها: يام اللي مزور خشي اللجنة 7 مرات.. أهي مرة بعمة ومرة بلوزة وفيونكات.. الشعب مصحصح علقة تفوت ولا بلدي تموت بيشارك أهه حط الصوت.. ناس من الحكومة هناك أهم.. أعمل كمين وأندهلهم.. لجنتكم زفت وقندلة.. اشطب وزور يا ولا.. يا ولاد الحلال حزب تايه طول كده.. عكازه الشمال أمن دولة زي ده.. ضاعوا يا ولداه.. يامامي.. كام مرشح تاه..

الفيش

ماما — Wed, 09 Apr 2008 17:48:17 +0000

الأسطى زين فرحات

مزين المنطقة

ماجابتوشى ولادة

هياخدلى دقن وشنب

وقفايا كالعادة

الأسطى زين فرحات

والموس على رقبتى

قلب دماغى سؤالات

عن المحليات

ممكن تقوللى يابيه

بتدخلوها ليه

وغرضكو منها إيه

راح تعملوبها ايه

تكونوش بقى ناويين

تغيرو الريس

لا دا انت بتهيس

الا بحق صحيح

ابو يحيى ليه مسكوه

وابوسمرة ليه اعتقلوه

وعبد الغنى قفشوه

تقدر تقوللى فى ايه

فى بانجو واللا حشيش

مسكوه بيعمل فيش

وعلى الفضائيات

يقولو الاعتقالات

على خلفية المحليات

هى المحليات كان ليها خلفية

من امتى المحليات كان ليها خلفية

طول عمرها ماشية

وممعدنة الآشية

ومبشبشة الحاشية

واخدينها تزكية

ليه اليومين دولم يبقى لها خلفية

عليكو من ده بإيه

واللا العناد غية

رافعين شعار إصلاح

ياعم قول يا صباح

بيقولك الاصلاح

عاوزين كلام ملموس

ورغيف لازم له غموس

تفرملو الاسعار

وبلدنا تبقى عمار

ياتمشو جنب الحيط

واياك فاكرنى عبيط

هتلملمو الاصوات وتاخدوالانتخابات

نتعشى بالشعارات

نتغدى بالخطابات

وتبقو من البهوات

وتنسو عم صلاح

والاسطى عبد الفتاح

وتعيشو افندية

لو عنكم تخطيط

وطريقة للتظبيط

وقابلة للتنفيذ

مش بق بس لذيذ

قولوها ورونا

وبلاها كتر كلام

ولكم منى ألف سلام

من قلبى وتحية

يا اسطى زين فرحات

موسك ياعم خلاص مبقاش على رقبتى

خد الكلام منى

وبلغه عنى

اسمع كلامنا وشوف

كلامنا عالمكشوف

ولاهوش كلام شعارات

ولا هو افتكاسات

من يومنا والاصلاح

القصد والنية

ولا عمر كان قصدنا يبقى العناد غيه

اصلاح طريقه مرسوم

مدروس وبالتفاصيل

وخطط ما ليها مثيل

تحل مشاكلنا فى كل دى المجالات

اسلامنا مش شعارات

اصلاحنا مش مشروط

بنجاحنا فى انتخابات

عايشين فى وسط الناس

وبامر رب الناس

نخدم فى كل الناس

من غير ما نستنى

غير اجر رب الناس

وخططنا عالمكشوف

خد اقرا بص وشوف

حالين رغيف العيش

وقعاد قهاوى مفيش

لكن بقى الخفافيش

مش عاوزة طاقة النور

تضوى تهد السور

مابيننا والاصلاح

عشان كده التقفيش

فى الخلق والتلطيش

وتقول ده تهمته ايه

يقولو تهمة مفيش

مسكوه بيعمل فيش

الواد بشندى

ماما — Mon, 17 Mar 2008 12:29:05 +0000

من وحى بعض ما يكتبه استاذنا أمين الديب كتبت قصة صغيرة عن الواد بشندى

الواد بشندى

الواد بشندى ابن ام عيد

فتح سوبر ماركت جديد

الواد ده اصله فهلوى يفوت فى الحديد

راح بورسعيد

وجاب بضاعة آخر تمام

ماهو أصل الواد بشندى ده له فى العلام

وواد ملحلح ومخه متنور تمام

انا رحت ابارك من يومين

وخدت فى ايدى الواد حسين

بعد السلام خدنا الكلام

الواد حسين ابن اسماعيل قال لنا

سمعتم الاخبار؟

رد عليه الواد بشندى وقال

الدنيا قايدة نار

انا قلت كفى الله الشر ليه؟قول

قالوا صحافة الدنمارك بيسبو الرسول

انا قلت له مش هما دول

اللى اتجرأو عليه من سنين

وقامو يومها المسلمين

والخلق يومها اتجمعو وصرحو وبعبعو وجعجعو

وقالو لا الا الرسول

مش هما دول

اللى ضحكو علينا بكلمتين

وضحكتين

ونيمونا بعدها النوم المتين

الواد حسين بن اسماعين

بصلى ومش عاجبه الكلام

قام اتنطر ولا شيخ غفر

زعق وقال

لا والله اللى بيحصل ده حرام

ومش تمام

لازمن علينا نصدهم

ونوقفوهم كمان عن حدهم

رد عليه الواد بشندى كمان وقال

ايوه

نروح نولع فى السفارة والعلم

ونحرقو اللى رسم واللى شتم

واللا انت ايه قولك يا عم امين؟

انا قلت

انا سبت دورى فى الكلام لاهل العلام

المتعلمين المتنورين

لكن كلامكم مش راح يحل المشكلة

ولا يمنع الجراة علينا وده اصل البلا

اتجراو على الرسول؟

كانو يعرفو مين الرسول

لا هما شافونا

قالو دول هما اتباع الرسول؟

طب شافو ايه ؟ طب شافو مين؟

شافو حريم متدلعين متشخلعين متعجرمين

ورجالتهم مسطولين

وشعوبنا غير الجهل عايشين مطحونين وفقرانين ومعدمين

لكنهم بالرغم من ده وده

عافيلم واللا الكورة دايما سهرانين ومبسوطين

وان كان فى غزة او جنين

صور ضنانا المقتولين والمدبوحين ما تسرش القلب الحزين

يبقى احنا امة الرسول؟

هيعرفو ازاى مين الرسول؟

لو الرسول بأمته؟

يبقى احنا ما نستاهلش شرف نكون من امته

ولا نشرب الشربة الهنية من ايده الشريفة فى جنته

تقدر تقوللى ينادينا ليه؟

وهنقول له ايه؟

اللهم صلى عليه

وعشان ننول هذا الشرف

لازمن نتابع سنته

ونكون بأخلاقه الشريفة مثال جميل لامته

نعيشو بالقرآن وكمان

نعرف العالم ايه هى تبقى شرعته

مش بس بالكلام

بالفعل والعلام

رد الهمام

العملة دى مش راح تفوت من غير عقاب

ولازم نعملو حاجة تخللى عيشتهم هباب

انا فلت له مين مش معاك؟

لازمن نقاطع اكلهم ولحمهم وزبدهم

ولا مليم من حدانا يدخل كرشهم

تقدر تقوللى البسكوتات دية منين

واللا العصير واللا اللبن ده كلها مصانعها فين؟

الواد بشندى لطم وقال:

متشكرين عالكلمتين

قوم ياللا روح يا اسماعين

وخد فى ايدك اليمين عمك أمين

لحد ما ابيع البضاعة أنا أصلى سالف حقها

والبنت زينب لساى باحوش مهرها

وان كان على نصر الرسول يكفينى بس انى اقول

وكلنا لازم نقول

اللهم صلى عليه

وطن ليس كأى وطن

ماما — Fri, 14 Mar 2008 08:30:17 +0000

وطنى ليس كأى وطن انه وطن ذو مواصفات خاصة يحلم المواطن فيه بالاصلاح فتسول له نفسه ان يشارك فى هذا الاصلاح يخرج من بيته ليقدم على استخراج فيش وتشبيه وكانه يقدم على عملية استشهادية يودع اهله ويوصيهم خيرا فلا يعود الا بعد عدة اشهر وقد لا يعود وبالرغم من هذا يخرج المسئول ليصدر تصريحا بان التقدم للترشيح يسير بمنتهى السلاسة والحق مكفول للجميع . اى جميع؟

يخرج مواطن آخر بعد صلاة الفجر ليحصل على بضعة ارغفة من الخبز وهو اما يخرج من الطابور منتصرا بعدة ارغفة او يخرج شهيدا على عربة اسعاف

ويصرح مصدر مسئول بان الرقابة محكمة جدا لضمان الخبز لمستحقيه

لعل الخطا حدث عندما خرج المواطن والمخطىء دائما هو المواطن مواطن آخر أخذ عبرة مما حدث لسابقيه فقرر ألا يخرج اليوم من منزله بلا خبز ولا إصلاح وليكن ما كان ولكنه لم يسعفه الحظ ان يستمتع فقبل ان يصل من ذهب ليأتى بالخبز وقبل ان يعود من ذهب للإصلاح يجد نفسه أيضا ضحية لعمارة منهارة

ويصرح المسئول أنه غير مسئول لان المسئول الذى قبله أصدر قرارات غير مسئولة وأن المسئولية تقع على المواطن فى كل الأحوال

ألم أقل لكم اننا فى وطن ليس كأى وطن

عذرا ..صاحبة الإسدال

ماما — Mon, 15 Oct 2007 12:20:55 +0000

تمر على أيام الشهر أتلمس فيها الرحمات والمغفرة والعتق من النار

أبحث عن خشوع القلب وأسأل الله إياه

يكاد الشهر يمضى ولا أدرى أمن السعداء أنا أم من الأشقياء؟

أقف فى الصف

وقفت بجوارى

أشعر برعدة خشوعها تسرى فى أوصالى

أنظر إليها بين الركعات يكاد بكاؤها لا ينقطع

تعمدت ألا أنتقل من جوارها لعل لها دعوة مستجابة تغمرنى نفحاتها

(هم الجلساء لايشقى بهم جليسهم) إنتهت الصلاة وقبل أن التفت اليها لأتعرف عليها قامت مسرعة وقبل أن ترتدى حذائها

إذا بها تخلع إسدالها وتطويه لتضعه فى حقيبتها وتصلح من شعرها

إنحنت لترتدى الحذاء إذا بظهرها يكاد ينكشف تماما

جلست فى مكانى مذهولة ونظرات الجميع تلاحقها شذرا والبعض يكاد يلعنها فى نفسه

إنصرفت وابتلعها الظلام ولكنها لم تفارق خيالى

فى اليوم التالى بحثت عنها بين الصفوف

وجدتها لم تتح لى فرصة الحديث معها

اختلطت مشاعرى بين الغضب والإشفاق والتساؤل

بحثت عن كلمات أحدثها بها لم أجد

خشيت أن أقسو عليها فأحرمها من أجر الصلاة فأحرم رعدة الخشوع التى تسرى بيننا

مرت ليلة وليلة وأنا مشغولة بها -صاحبة الإسدال- نمت فى المعتكف بين التراويح والتهجد وقد دعوت الله أن يلهمنى كلمات أحدث بها فتاتى فأكسب قلبها ولعلى حتى أنصحها الا تخلع إسدالها إلا بعد أن تيتعد عن مجال المسجد فلا تمر متبرجة امام الرجال

وإذا بى أرى فى منامى بناء كبيرا زجاجيا مضيئا متلألىء مبهر جدا وفتاتى تسكن فى قلبه فى مكان عالى جدا منه وأنا ألف حول البناء لأجد بابه فلا أجد له بابا وكأنه أوصد فى وجهى

أنظر إليها إذا هى سعييييييييدة مبتسمة ولكنها لا تكاد ترانى– استيقظت من نومى

مندهشة لما رأيت

نادى المنادى للتهجد خرجت بعد الوضوء بحثت عنها وقفت بجوارها

دعونا الله فى ليلة أحسبها ليلة القدر إنتهى الدعاء لم أتركها

أمسكت بيدها قبل أن تنصرف

قلت لها أنا لا أعرفك ولكنى رأيت لك كذا وكذا

إنهمرت دموعها واحتضنتنى وهى تصرخ (صحيح ياطنط بجد ياطنط ميرسى أوى ياطنط)

تركتنى مسرعة وهى تنادى الحمد لله يارب إبتلعها الظلام مرة أخرى ولكن هذه المرة

نسيت أن تخلع إسدالها وأسأل الله ألا تخلعه مرة أخرى

خجلت من نفسى وعلمت أننى قد لا أراها مرة أخرى أسأل الله أن يبلغها كلماتى عذرا يا صاحبة الإسدال عذرا أن تحدثنا نفوسنا أن نأخذ الناس بالمظهر ونظن أننا خير من فلان أو فلان ونحن لا نعلم كيف سيختم الله لنا او له اللهم أحسن ختامنا وتقبل منا ومن صاحبة الإسدال

خازوق السوارى

ماما — Sat, 28 Apr 2007 10:27:18 +0000

قبل أن ينتقد أحد العنوان تعالو بنا لنعيش أحداث هذه القصة

بدأت أحداث هذه القصة فى يوم من أيام الفصل الدراسى الثانى لما جاءتنى ابنتى بورقة كبيرة من المدرسة مكتوب عليها هيئة تنشيط السياحة

ومطلوب منها أن تنتقى اثنين من معالم الإسكندرية لترسمهم وتسلم الرسم بالمدرسة لتدخل مسابقة هيئة تنشيط السياحة

جلست توتة تبحث فى النت عن معالم الإسكندرية وانتقت أسهلها فى الرسم وهما عامود السوارى ومنارة الإسكندرية وعاونتها فى الرسم وسلمت المسابقة

ونسينا الأمر تماما

أمس جاءنى الإتصال التالى

-حضرتك والدة تسنيم

-أيوة

-تسنيم فازت بجائزة وزارة السياحة لأنها الوحيدة التى رسمت عامود السوارى

شوية أسئلة عن بابا بيشتغل إيه وماما بتشتغل إيه وساكنين فين؟

المهم وأنا زى الهبلة أعطيت كل المعلومات بما فيها معلومة أننا عائدون من الخارج وإن بابا مازال يعمل فى الخارج.

طبعا صاحب المكالمة أصر أن هناك حفل سيقام فى عنوان كذا الساعة كذا ولازم تسنيم تحضر لان لها جائزة قيمة.

ياسلام على السعادة وعمار يامصر الواحد هيبتدى أهوه يدخل فى جوائز الدولة التشجيعية ويعيش الدور فى بلده كمواطن حاجة جميلة جدا

تم إبلاغ أفراد العائلة بالنبأ السعيد وذهبنا لإستلام الجائزة من مقر وزارة السياحة كما قيل لنا،

جميع أفراد الامن فى مداخل العمارة المذكورة حينما تسألهم عن مقر وزارة السياحة يشيرون إليك بمقرها بثقة تامة.

إستقبلنا شاب فى مدخل العمارة كمندوب لوزارة السياحة الحقيقة كان شكله شاحت البدلة من المكوجى ومع علمى أن كوادر وزارة السياحة رواتبهم جيدة لكن قلت غلبان طلع نزل موظف حكومة.

طلعنا للشقة المطلوبة وأصر مرافقنا أن ننعطف داخل الشقة يمينا وليس يسارا

فى المدخل كم من الدراجات والعلب المغرية والهدايا الملفوفة تصور للداخل أنه سوف يحصل على إحداها يقينا وهو خارج

فى إستقبالنا فتاتان متعجرمتان المظهر وإن كان شعرهما قد أعمل فيه مكوجى الرجل مكوته طبعا بمجرد ذكر إسم تسنيم كانت الفهشة تسنيم اللى جاية من السعودية؟؟؟؟؟؟واو هنا بدأت أقلق….فى الطرف الآخر من الشقة ساتر أسمع من خلفه أصوات حفلة للأطفال صاخبة جدا وأصوات صيحات أطفال تتعالى بشكل يجعلك لا تستطيع الإنتظار فالمتعة فى إنتظارك.

لا أستطيع أن اصف لكم كم البيانات التى أدليت بها وأنا مغيبة تماما بوعود السحب على اللاب توب (من زمان نفسى فى لاب لوب)والبلاى ستيشن وشهادة الإستثمار لدرجة اننى هممت ان اعطيهم رقم حسابى فى البنك خوفا ان تاتى الجائزة ونحن فى خارج مصر

وجاءت اللحظة التى انتظرتها طويلا

لحظة إستلام الجائزة

دخلنا خلف الساتر حيث الحفلة الصاخبة

لأجد نفسى وسط طاولات مستديرة على كل طاولة عائلة وشخص يتكلم بسرعة 50 كلمة فى الدقيقة وكان من نصيبى طاولة وآنسة محجبة (على كل لون ياباتستا)

بدأت الصورة تتضح فى ذهنى حيث الحفلة ماهى إلا صوت كاسيت فقط والجميع يجلس ليستمع لشخص يأكل دماغه ليقنعه بشراء شاليه فى قرية زعبوللا فى شرم الشيخ او الإشتراك فى تايم شير

وهنا قررت أننى سأنصرف فى أقرب فرصة

بدأت الآنسة بالحديث عن جمال رسم تسنيم والسؤال عن معالم الإسكندرية وجمال البحر والهواء والمياه

ثم تطرقت للسؤال عن ما إذا كنت أفكر فى شراء شاليه على البحر

فكان الرد لا

لماذا

ليس عندنا أى فلوس

طيب تايم شير

ولا حتى فلوس للتايم شير ولو معاكم 5 جنيه نروح بيها البيت يبقى كتر خيركم

هنا أدركت الفتاه انه لا حيلة لها معى

طيب حضرتك ممكن أستأذن المدير لو تسنيم تدخل التصفية بنفس الرسم ده

(هم يحتجزون أطفال العائلات اللى ييجى منها بحجة انهم هيرسمو ويبدعو علشان يدخلو التصفية وبينما هم يحتجزون طفلك تستمع أنت لآكلى دماغك بكل لغات البرمجة العصبية لتخرج مشتريا او مشتركا فى تايم شير)

وهنا حيث لافائدة ترجى من ورائى فخسارة الترابيزة والألوان

أعطتنى الفتاة ورقة بأسبوع مجانى فى قرية زعبوللا لأربعة أفراد مع الإلتزام بدفع ثمن الوجبات قبل الذهاب

وخرجت وأنا دماغى يغلى اننى وقعت وإستدرجت لعملية نصب بإسم المدرسة

كنت أقابل الكثير منهم أمام المطاعم الفخمة وكارفور وغيره بنظام الف مبروك كسبت معانا ماانا عارفة ايه ولكن عملية نصب تشارك فيها مدرسة إستثمارية هذه جديدة

كان من نصيب توتة جائزة فخمة جدا عبارة عن ادوات لعب على الشاطىء (ب3جنيه)

نسيت ان اقول لكم توقعت ان تتسلم توتة الجائزة من محافظ الاسكندرية مثلا او شخص مهم بوزارة السياحة ويسألها تعرفى ايه عن عامود السوارى

فبحثنا عن تاريخ العامود على النت وعلمنا أنه أقيم لتخليد ذكرى الملك دقديانوس فى العصر الرومانى وحيث أن دقديانوس ده كان طاغية وهو تقريبا الذى فر منه أهل الكهف فيبدو ان العامود كان تخليدا لذكرى خوازيق هذا الملك

وبالتالى فهو خازوق السوارى وليس عامود السوارى وكل خازوق ونحن بألف خير

وما يقع إلاالشاطر

ياريته ما صلى على النبى

ماما — Tue, 03 Apr 2007 13:58:13 +0000

ياريته ما صلى على النبى

بالراحة اللى كان هيحدف بحاجة يستنى شوية

أوصانا الحبيب عليه افضل الصلاة والسلام ان نكثر من الصلاة عليه ومن صلى عليه صلاة صلى الله بها عليه عشرة

جميل ان جدتى لما تحكيلنا حدوتة تقول صلو على النبى الاول او مثلا وانت ناسى حاجة تصلى على النبى عشان تفتكرها لكن فيه بعض المواقف باشوف الناس بتصلى على النبى واقول ياريته ما صلى عليه

مثلا -واحد بيعاكس واحدة يقوم ماسح مسح جغرافى لكل تضاريسها بعينيه ويقول اللهم صلى على جمال النبى ده ينفع؟

-واحد عاوز يوصل لك رسالة انك لازم تسيب حقك وتاخد على دماغك وتسكت يقوم يقولك ياعم صلى على النبى

-واحد بيفتح معاك نميمة وانت بتقوله دع الخلق للخالق يقولك صلى على النبى ده كيت وكيت وكذا وكذا

-والافظع بقى زفة فى فرح والكل ناسى يلبس هدومه والراقصة الفاميلى سايز تترنح والكل يصفق صلى على النبى صلى على النبى او صلى صلى واللى ما يصلى مش عارفة ابوه ايه وامه ايه ده ينفع

-طيب دول ناس بيئة مثلا وياى منهم.

الناس بقى اللى مش بيئة فى اول الفرح (والكل برضو بينسى يلبس هدومه صيف وشتاء) تلاقى هشام عباس يغنى اسماء الله الحسنى والناس آخر خشوع وأول ما يقول اللهم صلى على اسعد مخلوقاتك هوببا تلاقى الكل بيتمايل ويصفق والبعض يرقص فيه ايه ياناس

واللا اللى بيرقصو على اغانى سامى يوسف واللى برضو بيصلى فيها على النبى ياجماعة لازم ذكر النبى صلى الله عليه وسلم له احترامه وآدابه ماينفعش نقرنه بافعال غير مناسبة له.

ارقصو على حكيم او العنب لكن كله الا ذكر النبى

وعلى فكرة اللى نبهتنى للنقطة دى صديقة نصرانية اعتز بها جدا كانت مستغربة من ان المسلمين لا يحترمون ذكر نبيهم بالقدر الكافى مهما اختلفت الافكار او كان لنا اى اعتراض على كلامها ولكن فعلا نحن نحتاج لتنزيه نبينا عن مجالس اللغو ونخشع فى ذكره صلى الله عليه وسلم وعذرا يارسول الله ماما

فى ذكرى اغتيال الشيخ احمد ياسين

ماما — Fri, 23 Mar 2007 17:29:20 +0000

آآآآآآآآآآآآه يابشرآآآآآآآآآآآه يابشر

قلوبكو ليه صارت حجر

لوشفتو حدوتة ياسين

يشهد عليها كرسيه اللى انكسر

ياسين أهو رافع ايديه

بيدعى ربه فالسحر

مبقاش فالعمر يارب قد اللى راح

يارب قد أصابنى الكبر

أرجوك يارب اكون شهيد

واكون هناك ويا الحبيب ويا بلال ويا عمر

الفجر لاح

خرج ياسين على كرسيه ابوعجل

اي والله هو ذاته اللى انكسر

صلى الفريضة

مسح بإيده وجه كمالقمر

خرج ياسين عالكرسى ذاته اللى انكسر

نزل الصاروخ إغتال ياسين

والكرسى من حزنه إنكسر

دم الشهيد دمه انتثر

لحمه إتنطر

والكرسى أبو عجل إنكسر

آآآآآآه يابشر آآآآآآآه يابشر

دخان كثيف يعمى البصر

طلعت معاه روح الشهيد

ووجهه لسه كالقمر

آآآآآآآآآه يابشر آآآآآآآآه يابشر

جوايا بركان مالغضب لساته ياناس مانفجر

ومن بين دموعى أرجع وأقول

كفكف دموعك أصل البكا للنسا مش للرجال

وقوم ياولدى اغزللى مالحزن ثوب من الغضب

امسك سلاح امسك حجر سيح به دم للركب

قوم يابنى لم اللحم اللى اتنطر

عالارض فوق به قلب مالحجر

مبقاش يشوف عماه فى قلبه مش بصر

مستنى لما يجيه صاروخ زى اللى بيه قتلو ياسين

ليه هو مين؟لاكان ياسين ولاعمر

اصل البعيد حاكم عميل

اتعلم انه لسيده ديل

حكامنا دول اشباه رجال

او قول قطيع من البقر

غاويين قمم غاويين خطب غاويين صور

حتى الكلام يخاف يقوله

غير بعد ماسيده نكر

والنكته عم ابو جمال

زين الرجال

كان آخر المتكلمين

لما افتكر

قام اتنطر

صرح له تصريح من عجب

لاقام شجب ولا نكر

قام قال يا اسرائيل

اتعلمو منا الادب

مش راح يزوركم وفدنا

ولا راح ياخد له بدل سفر

وايه السبب

انا اصلى زعلان منكو

وشعبى راح يخاصم شعبكو

مش كنتو قبل ماتعملوها تدونى برضو ولو خبر

اصل الشهيد والكرسى اللى انكسر

فى نظر شارون الاتنين خطر

ماما — Fri, 23 Mar 2007 07:54:36 +0000

فى بيت العائلة الريفى الكبير كانت هناك الست ستيتة يطلع من تحت ايدها اجدعها فطيرة مشلتتة واللا تجدها فى صحن الدار وقد عكشت دكر بط تحت ابطها تزغطه وهو يكاد يلفظ انفاسه بين يديها ولأنها فى مهنة اهل الدار عادة تكون قد تخلت عن طرحتها فإذا أراد احدهم ان يدخل ينادى من خلف الباب دااااستووووووور يا هل الدار (قد يقولها وهو داخل فعلا ) المهم ان ستيتة وبحركة تلقائية تهتم جدا بتغطية راسها فترفع ذيل جلابيتها لتغطى رأسها بغض النظر عما كان يغطيه ذيل الجلابية

سألت والدى ما معنى داستور فقال انها كلمة تعنى الاذن من اهل البيت بالدخول فتتغطى المتخففة من ثيابها ويقعد الراقد وخلافه سألته ولكنهم يقولونها بعد ان يكونو قد دخلو فعلا قال انه استخفاف بالإذن وبأهل الدار هما اللى عودوهم على كده لو منعوه مرة فسيهتم بالإستئذان جيدا بعدها

رحم الله أبى ورحم ستيتة وغفر لها وغفر للمستهزئين بالدستور وباللى عودوهم على كده

ولنا عودة مع التعديلات والست عديلة المعدلاتية بس نقول الاول داستوووووور يا اهل البلد