مامتكم دوت كوم

فى بيت العائلة الريفى الكبير كانت هناك الست ستيتة يطلع من تحت ايدها اجدعها فطيرة مشلتتة واللا تجدها فى صحن الدار وقد عكشت دكر بط تحت ابطها تزغطه وهو يكاد يلفظ انفاسه بين يديها ولأنها فى مهنة اهل الدار عادة تكون قد تخلت عن طرحتها فإذا أراد احدهم ان يدخل ينادى من خلف الباب دااااستووووووور يا هل الدار (قد يقولها وهو داخل فعلا ) المهم ان ستيتة وبحركة تلقائية تهتم جدا بتغطية راسها فترفع ذيل جلابيتها لتغطى رأسها بغض النظر عما كان يغطيه ذيل الجلابية

سألت والدى ما معنى داستور فقال انها كلمة تعنى الاذن من اهل البيت بالدخول فتتغطى المتخففة من ثيابها ويقعد الراقد وخلافه سألته ولكنهم يقولونها بعد ان يكونو قد دخلو فعلا قال انه استخفاف بالإذن وبأهل الدار هما اللى عودوهم على كده لو منعوه مرة فسيهتم بالإستئذان جيدا بعدها

رحم الله أبى ورحم ستيتة وغفر لها وغفر للمستهزئين بالدستور وباللى عودوهم على كده

ولنا عودة مع التعديلات والست عديلة المعدلاتية بس نقول الاول داستوووووور يا اهل البلد

مش قادرة اصدق ان اللبن اللى بأشربه لاولادى وباغصب عليهم احيانا يشربوه وفاكرة انى كده بأؤدى واجبى ناحيتهم يطلع بودرة سيراميك وسماد يوريا وبوتاس ومانا عارفة ايه

أنهى إبليس إبن أبالسة زين لإبن آدم ان يفعل هذا طول عمر الناس بتغش اللبن لكن سمعنا عن المياه وسمعنا عن النشا والدقيق ولما سمعنا عن الفورمالين قلنا بلاها لبن سايب خللينا فى العلب

قوم يطلع كله مضروب وكمان مش بس مغشوش لا ده مسموم وبنستغرب من الفشل الكلوى وسرطانات الكبد والقولون وخلافه آآآآآآآآآآآآآآآآآآه يابلد ولادك بيبلبعو السموم من أول توفيق عبد الحى والسالمونيللا اللى أدمناها لغاية انفلونزا الطيور وسماد أونكل والى لغاية السيراميك وأنا أقول المجارى بتتسد وتطفح ليه ماهو اللى هيشرب بودرة سيراميك هينزلها متصنعة أشكال وأصناف عاوزين بلاط كام فى كام ده على كده عيالى بلبعو ما يكفى لكسوة الحمام كل سنة مرة

بلاها حليب ومنتجاته بس المشكلة الاكبر هاغنى لهم اقول ايه

عارف الواد اللى اسمه حنكش جه الدكتور وعمل له ايه راح مديله حقنة كبيرة عارف اداله الحقنة ليه مابيشربش البانجو الصبح وكل اصحابو ضحكو عليه واهو من يومها شرب واتسلطن
وعمللو دماغ ولا أجدع بيه

يارب بس مانصبحش نلاقيهم بيقولو البانجو كمان مغشوش

ماما

أصبت بالغثيان وانا يمر أمامى شريط متحرك فى قناة فضائية هلسية الشريط فيه التالى -أنا المزوجة غصب ابغى أتعرف على الشباب -المزوجة غصب انا فارس الليل باجيك وين ماتكونى -المزوجة غصب أنا بالدمام

-فارس الليل انا بجدة جوالى بالكنترول

-هيفاء شقراء ولهانة اريد شاب للحب جاد -الولهانة انا زليط من كفر ابو طشت للحب -الهيفاء متازمنيش يازليط عاوزة من المهندسين -تامر من فيصل أنفع يا هيفاء رقمى بالكنترول

-الهيفاء هاتصل يا تامر سورى يازليط

ممكن طبعا الهيفاء تتصل يطلع زليط بس غير اسمه

المتابع لهذا الشريط لا يتمالك نفسه الا ان يقتنع بأن هذه القناة لابد وان تكون قناة قرنى الفضائية

إذن عليك بالريموت وغير المحطة والا شاركت فى الإثم وكنت ساكتا عن الحق وما اكثر القنوات الدينية وإذا بهذا الشريط وراك وراك زى عملك الرضى وفيه -منتقبة بيضاء 32 سنة اريد زوج يتقى الله -مصرى بالكويت اريد زوجة مقيمة بالسعودية -متزوج مقيم بالسعودية اريد زوجة ثانية عندها شقة ودخل مناسب -الى المنتقبة البيضاء سعودى متزوج ثلاث جوالى بالكنترول -الى المصرى بالكويت مدرسة مصرية بالسعودية لسة خالعة زوجى كلهم جوالهم بالكنترول وكله بيوصل لكله وكله بيكلم كله والمتفرج مطلع الإيريال على الآخر وكله تحت وهم الزواج وما هو الا سوق نخاسة والفرق أن قرنى اصبح الحاج قرنى وما أسخم من ستى الا سيدى ويعلن لك الحاج قرنى عن سفوف الزعبوط للشفاء من كل الامراض وشعارنا ارمى الريموت وسف الزعبوط لعلاج أمراض انفقاع المرارة من الفضائيات وما حدش بيموت ناقص عمر وومن لم يمت بالريموت مات بغيره

ماما

فلاش منقول من مدونة جعان” />

<

بعض العبارات مقتبسة من موضوع للآنسة حرنكش بقهوة كتكوت

قناة عيش أيامك عيش لياليك الفضائية برنامج خللى شبابك يفرح بيك بناتى الحلوين انتشر الايام دى الحجاب جدا جدا والحمد لله تقريبا كل البنات اتحجبو هنعمل جولة بين البنات علشان نعرف هما اتحجبو ليه -انا اتحجبت علشان صاحبتى الانتيم اتحجبت وقالت لى هاخاصمك لو ما اتحجبتيش -الحقيقة انا اتحجبت لان شعرى باظ من كتر السشوار قلت اغطيه -باحب الحجاب جدا شكله بيدى احترام -كتير كلمونى عن الحجاب انو حاجة كويسة وبتدى حسنات كتير

-مش عارفة ساعات باحس ان الولاد بيحبو المحجبة اكتر ويوم ما بيفكر يتجوز بيتجوز محجبة

سالنا البنات ايه هو الحجاب وكان الرد -الايشارب -الايشارب الايشارب -الطرحة -الطرحة -الايشارب حوالى 80% كانت دى اجابتهم -اللبس الحشمة يعنى المغطى

-الطرحة والتونيك او العباية

سالنا البنات ممكن تخلعى الحجاب تحت اى ظرف من الظروف -يعنى اكيد لا بس فى الفرح اكيد طبعا هاقلعه 60% -مش هاخبى عليكى فى بعض المناسبات باقلعه 20%

-لا طبعا مش ممكن ده يحصل 20%

معانا الحاجة منيرة المستنيرة فتاوى جاهزة وتفصيل وعلى كل لون يا……… اهلا بيكى يا حاجة فى برنامجنا عاوزين نقول للبنات حاجة عن الحجاب والظاهرة اللى انتشرت دى ياترى سببها ايه -طبعا هى ظاهرة جميلة ان البنات ترجع تانى تحتشم وده حلو لكن احب اوضح لهم شروط الحجاب علشان يتحجبو صح -اول شرط انو يكون ستايل وشيك -تانى شرط انو يكون ماشى مع الموضة -تالت شرط انو ما يحرمهاش من انها تعيش انوثتها وتبرز مفاتن جسمها معانا تلفون سورى للمقاطعة ياحاجة اهلا بيك استاذ محمد ايه اللى بتقولوه ده وبتبوظو بيه عقول البنات حرام عليكم اتقو الله فى شرع ربنا لا لا يا استاذ محمد انا ما اسمحش كونتروووووووووووول ينقطع الاتصال الحاجة:طبعا ده نموذج للفكر الارهابى المتطرف المنتشر الايام دى بس هنقول ايه الحمد لله معظم بناتنا بخير وعايشين حياتهم بالرغم من كل ده نرجع بقى لشروط الحجاب -رابع شرط انو يكون بيعجب الاولاد -خامس شرط انو يكون فيه تهوية كويسة فى الصيف وبيدفى فى الشتاء وبكده لو الحجاب استوفى الشروط دى يبقى حاجة لذيذة خالص شكرا ياحاجة ربنا يكتر من امثالك معانا دلوقتى مدام شوشو شيك هتدينا آخر صيحات الموضة للمحجبات طبعا دلوقتى بعد المحجبة ستايل والمحجبة مودرن السنة دى كان معانا موضة الحجاب على واحدة ونص وقلنا اللى ماعندهاش حاجة محزقة من الوسط تلبس حزام على وسطها والجديد معانا الحجاب السحرى -واااااااااااااااااااو ايه بقى الحجاب السحرى -ده انها تلبس كارينا لون اللحم وتلبس عليها كل اللى نفسها فيه -ستوماك-بادى حمالات-اى حاجة اى حاجة كان نفسها فيها وبكده تعيش حياتها واللى يشوفها مايبقاش عارف ده لون بشرتها الطبيعى واللا هى لابسة حاجة لون اللحم -وماتنساش تلبس الايشارب طبعا -آه طبعا الايشارب علشان تبقى محجبة وبكده بناتى المحجبات تقدرو تعيشو حياتكم وتخرجو وتتمتعو وتعيشو حياتكم تربطو الايشارب على راسكم تربطوه على وسطكم المهم تعيشو حياتكم واوعو تسمعو كلام الارهابيين التكفيرين المتطرفين الوحشين.

عيد الاضحى وكل عام وانتم بخير